ចាប់ឃាត់ខ្លួនជនសង្ស័យចំនួន០២នាក់ ពាក់ពន្ឋ័ករណីរក្សាទុកថ្នាំញៀន
ខេត្តបាត់ដំបង៖ជនសង្ស័យចំនួន០២នាក់ត្រូវបានកម្លាំងផ្នែកប្រឆាំងគ្រឿងញៀន សហការជាមួយកម្លាំងផ្នែកព្រហ្មទណ្ឌ នៃអធិការដ្ឋាននគរបាលស្រុកសង្កែ បានចុះប្រតិបត្តិការល្បាតបង្ក្រាបឃាត់ខ្លួនពាក់ព័ន្ធទៅនិងករណីរក្សាទុក ដោយខុសច្បាប់នូវសារធាតុញៀន។
ការចុះប្រតិបត្តិការណ៍នេះបានធ្វើឡើងកាលពីវេលាម៉ោង១០និង៣០នាទី ថ្ងៃទី២៥ ខែវិច្ឆិកា ឆ្នាំ២០១៩ នៅភូមិសាស្ត្រចំណុចក្រុមទី៨ ស្ថិតនៅក្នុងភូមិកំពង់ម្តោក ឃុំអូរដំបង២ ស្រុកសង្កែ ខេត្តបាត់ដំបង ខណៈពេលដែលកម្លាំងជំនាញកំពុងចុះល្បាត។
លោកអនុសេនីយ៍ឯក សំ ប៊ុនហេង នាយផ្នែកប្រឆាំងគ្រឿងញៀននៃអធិការដ្ឋាននគរបាលស្រុកសង្កែបានឲ្យដឹងថា ជនសង្ស័យទាំង០២នាក់ ដែលត្រូវបានកម្លាំងរបស់លោកចាប់ឃាត់ខ្លួននោះ
១-ឈ្មោះ លឿម ចាន់ដេត ភេទប្រុស អាយុ២២ឆ្នាំ មានទីលំនៅក្នុងភូមិស្វាយធំ ឃុំអូរដំបង២ ស្រុកសង្កែ ខេត្តបាត់ដំបង និង។
២-ឈ្មោះ ស្រេង ងួនស្រៀង ភេទប្រុស អាយុ១៦ឆ្នាំ មានទីលំនៅក្នុងភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង។
ក្រោយពីឃាត់ខ្លួនជនសង្ស័យខាងលើជំនាញដកហូតបាននូវវត្ថុតាងមួយចំនួនរួមមាន:
-ប្រភេទម្សៅក្រាមពណ៌សថ្លាច្រកក្នុងថង់ប្លាស្តិកចំនួន០១ថង់ទម្ងន់ ១,៤៨ក្រាម
-ទូរស័ព្ទដៃចំនួន០១គ្រឿង
-ម៉ូតូចំនួន១គ្រឿងនិងសម្ភារៈប្រើប្រាស់មួយចំនួនទៀត។
លោក សំ ប៊ុនហេង បានបញ្ជាក់បន្ថែមថា ក្នុងចំណោមជនសង្ស័យទាំងពីរនាក់ខាងលើ ជនសង្ស័យឈ្មោះ លឿម ចាន់ដេត សមត្ថកិច្ចធ្លាប់ធ្វើការអប់រំជាច្រើនដងហើយ តែមិនកែទើបឈានដល់ការឃាត់ខ្លួនយកតែម្តង។
បច្ចុប្បន្នជនសង្ស័យរួមជាមួយវត្ថុតាង ត្រូវបានសមត្ថកិច្ចជំនាញកំពុងរៀបចំសំណុំឯកសារបញ្ជូនបន្ត ទៅកាន់ការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីចាត់ការតាមនីតិវិធី៕
