សមត្ថកិច្ច ចាប់ខ្លួនស្មៀនសង្កាត់តាខ្មៅ សង្ស័យស៊ីដាច់លុយឧបត្ថម្ភជូនជនក្រីក្រជាង ៦០លានរៀល
កណ្ដាល៖ កម្លាំងនគរបាលនៃស្នងការដ្ឋាននគរបាលខេត្តកណ្ដាល បានឃាត់ខ្លួន ស្មៀនសង្កាត់តាខ្មៅម្នាក់ ពាក់ព័ន្ធករណី រំលោភលើទំនុកចិត្ត ដោយសង្ស័យស៊ីដាច់លុយ និងបន្លំដកយកសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រជាង ៦០លានរៀល នៅក្នុងអំឡុងពេលជំងឺកូវីដ-១៩ ប្រព្រឹត្តទៅនៅរដ្ឋបាលសាលាសង្កាត់តាខ្មៅ ក្រុងតាខ្មៅ ខេត្តកណ្តាល។

នគរបាលនៃស្នងការដ្ឋាននគរបាលលខេត្តកណ្ដាល បានឲ្យដឹងថា ជនសង្ស័យឈ្មោះ សុខ សុផា ភេទប្រុស អាយុ៤៦ឆ្នាំ រស់នៅភូមិព្រែកសំរោង២ សង្កាត់តាខ្មៅ ក្រុងតាខ្មៅ ខេត្តកណ្តាល ជារបរស្មៀនសាលាសង្កាត់តាខ្មៅ ត្រូវបាននគរបាលចាប់ខ្លួននៅថ្ងៃទី១៤ ខែវិច្ឆិកា ឆ្នាំ២០២២ និងត្រូវបានបញ្ចូនទៅកាន់ស្នងការដ្ឋាននគរបាលខេត្តកណ្តាល ដើម្បីរៀបចំបែបបទ និងកសាងសំណុំរឿងបញ្ជូនបន្តទៅកាន់កាន់តុលាការ ចាត់ការតាមនីតិវិធីច្បាប់។

នៅចំពោះមុខសមត្ថកិច្ច ជនសង្ស័យបានសារភាពថា ពិតជាបានធ្វើការផ្ទៀងផ្ទាត់ និងរក្សាទុក និងបានទៅដកប្រាក់ពីកម្មវិធីមករក្សាទុកខ្លួនឯង និងមិនប្រគល់ប្រាក់ ព្រមទាំងប័ណ្ណសមធម៌ជូនម្ចាស់ដើមពិតប្រាកដមែន៕