ករណីផ្ទុះអាវុធជាច្រើនគ្រាប់លើភ្នំគិរីរម្យ សមត្ថកិច្ចចំរុះចុះទៅស្រាវជ្រាវ បានរកឃើញសំបកអាវុធបាញ់រួចជាង២០០គ្រាប់

ថ្ងៃចន្ទ ០១កើត ខែកត្តិក ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី១៣ ខែវិច្ឆិកា ឆ្នាំ២០២៣

ខេត្តកំពង់ស្ពឺ ៖ រកឃេីញ​មុខ​អ្នកបាញ់លេី​ភ្នំ​ គីរី​រម្យ​ ឈ្មោះ​ ឆាយ​ ម្នាក់​ហេីយ​ នៅមានទៀត​ ពេល​នេះ​ សមត្ថកិច្ច​ នគរបាល​ និង​ កងកម្លាំងកងរាជ​អាវុធ​ហត្ថ​ខេត្ត​កំពង់​ស្ពឺ​ កំពុង​សហការ​ចុះ​ស្រាវជ្រាវ​ករណី​នេះ​ដដោយយកចិត្តទុកដាក់បំផុត​ ។

ប្រភពព័ត៌មានបានឲ្យដឹងថា កាលពីព្រឹកថ្ងៃទី១៣ ខែវិច្ឆិកា ឆ្នាំ២០២៣ អាជ្ញាធរខេត្តកំពង់ស្ពឺ បានបង្កើតគណៈកម្មការចំរុះមួយចុះទៅស្រាវជ្រាវនៅចំណុចផ្ទះលំហែស្ថិតនៅភូមិថ្មី ហៅចំការតែ ឃុំចំបក់ ស្រុកភ្នំស្រួច ខេត្តកំពង់ស្ពឺ ជារបស់ឈ្មោះ ឆាយ ភេទប្រុស អាយុប្រហែល២៨ឆ្នាំ រស់នៅរាជធានីភ្នំពេញ ដែលគណៈកម្មការនេះមាន អាជ្ញាធរភូមិ ឃុំ មន្ត្រីបរិស្ថាន និងកម្លាំងនគរបាល និងកងរាជអាវុធហត្ថផងដែរ បន្ទាប់ពីទទួលបានព័ត៌មានពីការបាញ់បោះសេរីជាច្រើនគ្រាប់។

ប្រភពព័ត៌មានបន្ថែមថា : ក្រោយសួរនាំសាក្សីមួយចំនួននៅកន្លែងកើតហេតុ សមត្ថកិច្ចបានដឹងថា កាលពីថ្ងៃទី១១ ខែវិច្ឆិកា ឆ្នាំ២០២៣ ចាប់ពីវេលាម៉ោង១៦:០០ រហូតដល់យប់ជ្រៅ នៅទីតាំងកើតហេតុមានកម្មពីធីខួបកំណើត និងមានការបាញ់បោះសេរីជាបន្តបន្ទាប់។

ប្រភពបន្ថែមថា : សមត្ថកិច្ចបានរកឃើញវត្ថុតាងជុំវិញកន្លែងកើតហេតុរួមមាន សំបកគ្រាប់កាំភ្លើងខ្លីចំរុះចំនួន ១១២គ្រាប់ សំបកគ្រាប់កាំភ្លើងM16ចំនួន ៣៦គ្រាប់ និងសំបកគ្រាប់កាំភ្លើងAKចំនួន៥៥គ្រាប់។ គណ:កម្មការបាននាំវត្ថុតាងទាំងអស់យកទៅរក្សាទុកនៅអធិការដ្ឋាននគរបាលស្រុកភ្នំស្រួច ដើម្បីធ្វើការស្រាវជ្រាវបន្ត។

សូមជម្រាបជូនថា : សមត្ថកិច្ចទាំងកម្លាំងកងរាជអាវុធហត្ថ នគរបាល ត្រូវចាត់វិធានការដោយក្តៅគគុក ដើម្បីអនុវត្តច្បាប់ចំពោះជនប្រព្រឹត្តបទល្មើស បាញ់បោះសេរីក្នុងប្រទេសដែលមានច្បាប់ ៕