សម្តេចជោសែននាយករដ្ឋមន្ត្រីនៃព្រះរាជណាចក្រកម្ពុជាប្រកាសពីគំរោងជួយបណ្តុះបណ្តាលដល់យុវជនក្រីក្ររចំនួនជាង១លាននាក់
សម្ដេចតេជោសែន នៃព្រះរាជាណាចក្រកម្ពុជាបានប្រកាសពីគម្រោងជួយបណ្ដុះបណ្ដាលដល់យុវជនក្រីក្រចំនួនមួយលានប្រាំសែននាក់ដោយឥតគិតថ្លៃ
ថ្ងៃច័ន្ទ ២កើត ខែមាឃ ឆ្នាំខាល ចត្វាស័ក
ពុទ្ធសករាជ ២៥៦៦ , ត្រូវនឹងថ្ងៃទី២៣ ខែមករា ឆ្នាំ២០២៣
(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី ២៣ ខែមករា ឆ្នាំ២០២៣នេះ បានប្រកាសពីគម្រោងផ្ដល់ការបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសប្រមាណ មួយលានប្រាំសែននាក់ ក្នុងមួយឆ្នាំនៅតាមគ្រឹះស្ថានបណ្ដុះបណ្ដាលវិជ្ជាជីវៈរបស់រដ្ឋ ក្នុងកម្រិតសញ្ញាបត្របច្ចេកទេស និងវិជ្ជាជីវៈកម្រិត១ ដោយមិនបង់ថ្លៃ និងទទួលបានប្រាក់ឧបត្ថម្ភប្រចាំឆ្នាំ ។ សម្តេចតេជោបានមានប្រសាសន៍បែបនេះ នៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា (CUS) ជិត៧ពាន់នាក់ ។
សម្ដេចតេជោ ហ៊ុន សែន មានប្រសាសន៍ថា៖ យើងនឹងធ្វើនៅចុងឆ្នាំនេះ ឬដើម ឆ្នាំក្រោយ បានសេចក្ដីថាយើងនឹងរ៉ាប់រងសម្រាប់សិស្សបណ្ដុះបណ្ដាលវិជ្ជាជីវៈ ដែលចេញពីគ្រួសារក្រីក្រគ្មានលទ្ធភាពរៀននៅមហាវិទ្យាល័យ ។ យើងយកពួកគាត់ទៅបណ្ដុះបណ្ដាលមិនត្រឹមតែមិនបង់ថ្លៃទេ ក៏ប៉ុន្តែយើងផ្ដល់ប្រាក់ឧបត្ថម្ភឱ្យពួកគាត់ថែមទៀត គឺបណ្ដុះបណ្ដាលធនធានមនុស្ស ។
សម្តេចតេជោហ៊ុនសែនបន្តថា “បើយើងដោះស្រាយក្នុងរង្វង់មួយលានប្រាំសែននាក់នេះ ខ្ញុំគិតថាសេដ្ឋកិច្ចក្រៅប្រព័ន្ធត្រូវធ្វើសមាហរណកម្មជាមួយនឹងសេដ្ឋកិច្ចក្នុងប្រព័ន្ធ”។ សម្ដេចមានប្រសាសន៍ថា សេដ្ឋកិច្ចក្រៅប្រព័ន្ធមានច្រើន ដែលចាំបាច់ត្រូវតែយកចិត្តទុកដាក់ ធនធានមនុស្សដែលបម្រើការនៅក្នុងសេដ្ឋកិច្ចក្រៅប្រព័ន្ធក៏មានច្រើន ដូច្នេះមួយលានប្រាំសែននាក់ដែលត្រូវបណ្ដុះបណ្ដាលក្នុងមួយឆ្នាំនៅពេលខាងមុខផ្ដល់ឱ្យពួកគេ នូវជំនាញដែលទទួលបាននូវការវិនិយោគពីខាងក្រៅកាន់តែច្រើន ខណៈតម្រូវការមិនមែនត្រឹមតែកម្លាំងទេ គឺទាមទារបច្ចេកទេសផងដែរ។
សម្តេចតេជោបន្តថា: កម្ពុជាមានសក្ដានុពលដោយមានមនុស្សវ័យក្មេងច្រើន ខណៈសមត្ថភាពនៅមានកម្រិតដូច្នេះ ហើយបានជាសម្តេចដាក់ឱ្យគណៈកមា្មធិការគោលនយោបាយសេដ្ឋកិច្ចសិក្សាអំពីបញ្ហានេះ លទ្ធភាពនៃការដែលយើងជំរុញការបណ្ដុះបណ្ដាលវិជ្ជាជីវៈឱ្យយុវជនក្រីក្រទទួលបានការបណ្ដុះបណ្ដាល មិនត្រឹមតែមិនបង់ថ្លៃទេក៏ប៉ុន្តែយើងត្រូវផ្ដល់ប្រាក់ឧបត្ថម្ភឱ្យពួកគាត់បន្ថែមទៀត។ យើងត្រូវប្រមើលមើលនៃការអភិវឌ្ឍរបស់ប្រទេស ដំណាក់កាលនៃឧស្សាហកម្ម ៤.០ ឬសេដ្ឋកិច្ចឌីជីថលទាមទារឱ្យមានការខិតខំទាំងអស់គ្នា៕
