កម្លាំងនគរបាលជំនាញ ធ្វើការស្រាវជ្រាវ ឃាត់ខ្លួនបានហើយ ជនសង្ស័យចំនួន០២នាក់ ជាជនជាតិវៀតណាម ដែលរត់គេចខ្លួនពីពន្ធនាគារនៅខេត្តស្វាយរៀង!

ស្វាយរៀង៖កាលពីថ្ងៃទី២៨ ខែតុលា ឆ្នាំ២០២៤នេះនៅ វេលាម៉ោង ១៦និង៤០នាទី ក្រោយពីបានទទួលព័ត៌មានពីមន្ត្រីអគារអនុរក្សពន្ធនាគារខេត្តស្វាយរៀង ថាមានករណីទណ្ឌិត ឈ្មោះ ង្វៀង ចុងង្វៀង ភេទប្រុស អាយុ ២៤ឆ្នាំ ជនជាតិវៀតណាម បានរត់គេចខ្លួនពីពន្ធនាគារខេត្តស្វាយរៀងរួចមក​ កងកម្លាំង នៃស្នងការដ្ឋាននគរបាលខេត្តស្វាយរៀង សហការជាមួយកម្លាំងអគារអនុរក្សពន្ធនាគារ និង​នាយកដ្ឋាននគរបាល​ព្រហ្មទណ្ឌ​ ព្រមទាំងអនុវត្តតាមបទបញ្ជា និងអនុសាសន៍ដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បញ្ជាដឹកនាំផ្ទាល់ពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង បានចាត់តាំងលោកវរសេនីយ៍ឯក គឹម ឡៃ ស្នងការរងទទួលផែនការងារនគរបាលព្រហ្មទណ្ឌ ដឹកនាំកងកម្លាំងជំនាញ ចុះធ្វើការស្រាវជ្រាវ ព្រមទាំងបានសហការជាមួយកម្លាំងបញ្ជាការដ្ឋានកងទ័ពការពារព្រំដែនខេត្តឡុងអាន នៃសាធារណរដ្ឋសង្គមវៀតណាម បានធ្វើការស្រាវជ្រាវ និងឃាត់ខ្លួនជនសង្ស័យ ០២នាក់ រួមមាន÷
១- ឈ្មោះ ង្វៀន ចុងង្វៀង ភេទប្រុស អាយុ ២៤ឆ្នាំ ជនជាតិវៀតណាម (ជនជាប់ឃុំ) និងជាមុខសញ្ញាមានដីកា របស់សមត្ថកិច្ចនគរបាលខេត្តង៉េអាន នៃសាធារណរដ្ឋសង្គមនិយមវៀតណាម។
២- ឈ្មោះ ង្វៀង ឌីងទន់ ភេទប្រុស អាយុ ២៣ឆ្នាំ (បក្សពួកដឹកជនជាប់ឃុំ)។

សមត្ថកិច្ចបានធ្វើការដកហូត÷ ម៉ូតូធ្វើសកម្មភាព ០១គ្រឿង និងអាវុធខ្លី ០២ដើម (អាវុធប្រើខ្យល់ ០១ដើម)។

បច្ចុប្បន្ន សមត្ថកិច្ចជំនាញកំពុងបន្តស្រាវជ្រាវ រកបក្សពួកផ្តល់មធ្យោបាយ ដើម្បីយកមកចាត់ការតាមនីតិវិធីច្បាប់។