ជនសង្ស័យម្នាក់ដែលលាក់ទុក កាន់កាប់និងប្រើប្រាស់អាវុធAKនិងអាវុធកែច្នៃ ដោយខុសច្បាប់ កម្លាំងនគរបាល ឃាត់ខ្លួន

ខេត្តកំពង់ស្ពឺ៖ ជនសង្ស័យម្នាក់ដែលលាក់ទុក កាន់កាប់និងប្រើប្រាស់អាវុធAKនិងអាវុធកែច្នៃ ដោយខុសច្បាប់ត្រូវបានកម្លាំងនគរបាលស្រុកឱរ៉ាល់ធ្វើការឃាត់ខ្លួន ខណៈដែលប្រជាពលរដ្ឋល្អរាយការណ៍ជូនសមត្ថកិច្ច។ ឃាត់ខ្លួនជនសង្ស័យកាន់កាប់អាវុធខុសច្បាប់កាលពីយប់ថ្ងៃទី២១ ខែតុលា ឆ្នាំ២០២៥ នៅចំណុចជើងភ្នំម្រេចស្ថិតនៅភូមិអូរអញ្ចា ឃុំតាសាល ស្រុកឱរ៉ាល់ ខេត្តកំពង់ស្ពឺ។

នគរបាលស្រុកឱរ៉ាល់បានទទួលព័ត៌មានពីប្រជាពលរដ្ឋល្អ ថាមានការរក្សាទុកនិងប្រើប្រាស់អាវុធដោយខុសច្បាប់ នៅផ្ទះចាំចំការមួយកន្លែងរបស់ឈ្មោះ ផែ ផល ហៅ ស្វិត ភេទប្រុស អាយុ៥៦ឆ្នាំ រស់នៅចំណុចជើងភ្នំម្រេចស្ថិតនៅភូមិ អូរអញ្ចា ឃុំតាសាល ស្រុកឱរ៉ាល់ ខេត្តកំពង់ស្ពឺ។

ក្រោយទទួលបានព័ត៌មាន កម្លាំងជំនាញរបស់អធិការដ្ឋាននគរបាលស្រុក រួមជាមួយកម្លាំងប៉ុស្តិ៍នគរបាលរដ្ឋបាលឃុំតាសាល សហការជាមួយកម្លាំងប្រជាការពារនិងលោកមេភូមិ ក៏ចុះទៅដល់កន្លែងទីតាំងធ្វើការស្រាវជ្រាវត្រួតពិនិត្យបានឃើញអាវុធចំនួន០២ ដើម ទី១-អាវុធ AK ស្វាយបត់ ០១ ដើមលេខ៧៧៦៧ ទី២-អាវុធកែឆ្នៃ ០១ ដើម ទី៣-បង់ចំនួន ០១ និងទី៤-គ្រាប់អាវុធ AK ចំនួន ០៤ គ្រាប់ផងដែរ។
ក្រោយពីធ្វើការត្រួតពិនិត្យឃើញនគរបាលបានឃាត់ខ្លួនជនសង្ស័យឈ្មោះ ផែ ផល ហៅ ស្វិត អាយុ៥៦ឆ្នាំ មកអធិការរដ្ឋាននគរបាលស្រុកឱរ៉ាល់ដើម្បីធ្វើការសាកសួរក្រោយពីធ្វើការសួរនាំ ជនសង្ស័យខាងលើបានឆ្លើយសារភាពថាអាវុធAK នោះខ្លួនបានមកពីឈ្មោះសាលួត នៅភូមិពោធិ៍មាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។
ជនសង្ស័យរួមជាមួយវត្ថុតាង អាវុធAKនិងអាវុធកែច្នៃ ត្រូវបាននគរបាលស្រុកឱរ៉ាល់សួរនាំ និងកសាងសំណុំរឿងបញ្ជូនបន្តទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការតាមផ្លូវច្បាប់៕